-2-
دلوقتى ياجماعه يسعدنى انى اعلن نفسى خبيره فى شوارع وحوارى مصر الجديده وعباس العقاد ، حد هايقولى ان الاماكن ديه مافيهاش حوالى هارد عليه واقوله يافلحوس تعالى معايا شويه انترفيوهات وانا اوريك العجب العجاب .
طبعا ياجماعه بعد الكم الهائل من الايميلات اللى ببعتها كل اسبوع ، والسى فى بتاعى اللى على كل المواقع حتى مواقع الطبخ ، لازم يجيلى انترفيوهات كتير ، بس انا قنوعه بروح بس تلت انترفيوهات فى الاسبوع ، وطبعا عشان اختار تلاته بس لازم اجيب غربال محترم ينفع فى الموضوع ده .
متفتكروش ده تكبر منى ولا حاجه ، بس الحكايه انى اكتشفت بعد مده من الزمن ان الناس اللى ببعتلها السى فى بتاعى مش بتبص فيه كويس او يمكن هو صعب اوى الله اعلم برده الواحد ميظلمش الناس ، ودليلى على كده ان بيجيلى انترفيهوات فى اماكن بعيده جدا عن مكان سكنى ياعنى لازم اشترى طياره هليكوبتر عشان اروح الشغل فى الميعاد كل يوم .
طب اسمعوا معايا المكالمه ديه :
- الو انسه علياء ؟
- مع حضرتك يافندم ( يا اخواتى على الاحترام بتاعى بيكون فى التليفون بس ياجماعه محدش يتوهم )
- انا ( مش عارفه مين ) من شركه ( اكيد مش فاكره اسمها ) حضرتك بعتيلنا السى فى بتاعك
- مظبوط يافندم ( ياعنى اكيد السى فى بتاعى معاها يبقى وصلها ازاى بالتلباثى مثلاً)
- حضرتك عندك انترفيو بكره الساعه واحده هاتقدرى تيجى ؟
- ممكن العنوان؟
- شارع (كذا ) سموحه ، انتى معندكيش مشكله انك تيجى اسكندريه صح ؟
طبعا مافيش رد على الاخت ديه ، ولمعلوماتكم ديه مش اول مقابله ليا فى اسكندريه ، كان فيه واحده قبلها بس فى سيدى بشر المره دى!
قيسوا على كده كتير ، المهندسين ، الدقى ، المعادى ، التجمع الخامس ، واخيرا سته اكتوبر ، لأ والاخ بتاع سته اكتوبر كان عنده اصرار رهيب لدرجه انى لما مرحتش الانترفيو طلبنى عشان يسألنى مرحتش ليه وحددلى ميعاد تانى مرحتوش تانى .
زى ماتقولوا كده انا حددت محيط حوالى اربعه كيلو ونص حوالين البيت عشان اشتغل ، حدودها ميدان الحجاز شمالا وعباس العقاد جنوبا مع الامتداد العرضى ليصل الى مساكن الشيراتون، شفتوا بقى الغربال ضيق ازاى ياجماعه .
ومع كده برده كنت بروح مقابلات كتير فى المحيط ده وطبعا مقدرش اقولكم المشى والتوهان اللى كان بيحصلى ، لأن طبعا اغلب الشركات بتكون فى شارع جوا شارع جوا حاره ياعنى مافيش تاكسى هايردى يلف معايا اللف ده وبالتالى كان التاكسى بيسبنى فى الشارع الرئيسى الاقرب وانا اكمل على رجلى لغايه لما الاقى المكان الميمون .
زمان كان الواحد يقول العنوان للتاكسى وهو يوصله على طول ، دلوقت الدنيا اتغيرت خالص ياجماعه ، بقى العادى ان مافيش سواق تاكسى عارف اى مكان ، او يمكن انا المنحوسه برده ده احتمال قائم ، الاجمل انهم مش بيقولوا انهم مش عارفين غير بعد ما اركب التاكسى واتدبس واللذيذ بقى لما اكون انا كمان مش عارفه الوصف ويبقى سواق التاكسى قرفان منى كأنى برتكب جريمه ، عشان كده قبل مااحط رجلى جوا العربيه اسأله عارف المكان الفلانى ،يقولى اه ، اقوله بس انا والله العظيم مش عارفاه، ده غير طبعا المرات اللى كان سواق التاكسى يبسبنى فى شارع على انه الشارع اللى انا عايزاه وبعد مايمشى اكتشف انى فى شارع تانى خالص .
وياريت بعد التعب والمصاريف ديه كلها كان الواحد بيشوف حاجات عدله ،ابدا ، انا بقالى اربع شهور بدور على شغل ، ياعنى ستاشر اسبوع ياعنى فى حدود اتنين وتلاتين مقابله ( هاقول رحت مقابتلين فى الاسبوع مش تلاته شفتم تواضع اكتر من كده) ، تخيلوا انى لاقيت بس خمس شركات متحترمه ممكن الواحد يشتغل فيها .
طبعا باقى الشركات ليها معاها مغامرات ولا فى الخيال هاحكيهالكم كلها فى الحلقات الجايه ان شاء الله .