-1-

النهارده السبت ، طبعا ناس كتير بتسألنى ايه المشكله فى ان النهارده السبت ، ارد عليكم واقولكم ان السبت ده بيكون بعد الجمعه على طول ، برده فى ناس تانيه هاتقولى ماهو كل اسبوع السبت بيجى بعد الجمعه ايه الجديد ( ده طبعا غير الناس اللى هاتاخدنى على قد عقلى وهاتقول انى اتجننت وهيتحمسوا وخلاص عشان احل عنهم ) سيبكم بقى من دول وخليكم فى اهميه السبت اللى بعد الجمعه .
الاهميه جايه من ان الجمعه ده بيكون فيه الجرايد اللى فيها اعلانات الوظايف ، وطبعا بما انى كسوله مش هافتح الجرايد ديه غير يوم السبت ، عشان كده ان بعلن السبت هو اليوم القومى لتمقيق العنين وتوسيخ الصوابع بالحبر وفتح الميل .
شفتم بقى السبت مهم ازاى ، واعلانات الوظايف ديه مش بس مهمه عشان انا بعيد عنكم وعن السامعين بدور على شغل بس ، لأ ديه كمان اداه تسليه رهيبه وبتكتشفوا فيها حاجات ومعلومات مفيده يمكن اكتر من المقالات اللى موجوده فى الجرنان ، ياعنى انا مثلا النهارده عرفت ان فى حاجه اسمها (سكرتيره ميدانيه ) طبعا انا معرفش ياعنى ايه وهموا موضحوش فى الاعلان ايه متطلبات ان الواحد يبقى سكرتيره ميدانيه بس اهو اتعلمت معلومه جديده وبعدين شغلت مخى شويه عشان اعرف ايه المتطلبات بتاعتها وبرده معرفتش وسألت البنيه اختى عن الموضوع ياعنى كمان الاعلانات بتساعد على التواصل الاسرى شفتم بقى اعلان واحد عمل فرق رهيب فى حياتى ازاى .
وفيه اعلان تانى برده كان مميز جدا ، الاعلان فى مجمله عادى لغايه لما جينا فى الاخر ولقيت انهم طالبين السن مابين خمسه وعشرين وتلاتين سنه ، طب اشمعنا مش عارفه ياعنى لو واحده عندها اربعه وعشرين او واحد وتلاتين هاتفرق فى ايه الله اعلم . صحيح انا ينطبق عليا الشرط ده بس برده مش فاهمه وبعدين لازم الواحد ياخد باله لحسن تكون الحكايه هاتطول ويعدى السن ويعلن اعتزاله قبل مايبدأ .
اعلان تانى بمرتب خيالى لامكانيات معقوله بس بشرط تكون غير محجبه ، انا هنا مش بتكلم عن الحجاب بوجوده او عدمه بس هايفرق ايه الحجاب فى الشغل ياعنى لا بيجيب صداع ولا بيغطى على العنين ولا اى حاجه ، طب بفرض انى مش محجبه ياترى كنت هابعت فى اعلان زى ده ، اكيد لأ ، المفترض ان البقاء للاصلح وان ده ميكونش معيار للحكم وخصوصا ان الشركات ديه شركات صغيره ياعنى مش فى بنك ولا شركه سياحه ليها شروط معينه فى مظهر العاملين .
طب احكيلكم على موقف فى يوم تليفون البيت رن واتصل واحد من شركه توظيف انا رديت عليه سألنى عن اختى واذا كانت بتشتغل ولا لأ انا رديت عليه عشان هى موجوده ( انا اساسا مش برد على التليفون طالما فى اى حد تانى فى البيت هو انا فاضيه !) المهم بعد ماسأل وقلته انها بتشتغل راح سألنى طيب انتى خريجه كليه ايه ؟ رديت عليه . وراح سألنى طب انتى محجبه قلتله اه سكت شويه وبعدين قالى طب مش مستعده تخلعيه فلما رديت عليه قالى ولا اختك بتفكر فى الموضوع ده وبعدين قعد ربع ساعه يعددلى فى مزايا الشركه اللى جايبلى وظيفه فيها انا واختى ايه رأيكم بقى ، ياعنى انا امكانايتى كانت كويسه وملائمه للوظيفه بس فيا عيب صغنتوت قد كده .
واعلان تانى طالبين مجموعه وظايف واعلان كبير ياعنى واضح انها احتمال 5% تكون شركه كويسه دورت على الايميل او رقم التليفون لاقيت كاتبين موقع عشان اللى يدخل يقدم قلت مش مشكله بصيت على الموقع عشان ابدأ انقل فيه لقيته على الشكل التالى مع اختلاف الحروف بس : HTTP://KIDMOM98PK JU0076KIUFE684 وبعد مادخلت الحاجات ديه واصبت بحول مؤقت لقيت الموقع موجود بس مش شغال لفتره مؤقته ، طب ليه ميكتبوش ايميل زى كل مخاليق ربنا ، ارد عليك واقولك امال هايتعبونا ويطلعوا عيون اللى عايزين يشتغلوا ازاى .
طبعا ديه بس مجرد بدايه فى رحله البحث عن عمل لأن الاعلانات هى ابسط جزء فى المهمه لسه فى اجزاء كتير تانيه هنتكلم فيها سوا كتير بعد كده ، طبعا اللى مش عايز يقرا اللى انا كتباه ممكن بمنتهى السهوله يدعيلى انى الاقى شغل بسرعه عشان ربنا يرحمه منى زى ما اخويا الصغير بيدعيلى عشان هو شايف انى بستعمل النت كتير وبقلل من سرعته وبابا بيدعيلى عشان يخلص من الدوشه اللى انا عملاها فى البيت وكل الطرق تؤدى الى روما .